चिमूटभर साखर.

चिमूटभर साखर. ( आयुष्यातील फार महत्वाची गोष्ट!!) आपण सर्व सुशिक्षित, उच्चशिक्षित मंडळी, जेव्हा एका ठिकाणाहून दुसरीकडे स्थलांतर करतो किंवा एका कार्यपद्धतीतुन दुसऱ्या कार्यपद्धतीत ( रोल ) जातो, किंवा ऑफिसमध्ये प्रमोशन होऊन नवीन ब्रांचला जातो वगैरे, त्यावेळी आपल्यापैकी अनेकांना अनेक अडचणी येतात. कारण आपली प्रत्येक विषयात काही ठाम मते किंवा पूर्व ग्रह असतात. कधी नवीन ऑफिसची कार्यपद्धती पटत नाही ( जुनेच ऑफिस बरे वाटते ), कधी नवीन हौसिंग सोसायटी किंवा राहण्याचा विभाग आवडत नाही, कधी नवीन संस्थेत काम करायला गेलो तर तेथे तेथील मंडळींबरोबर जुळवून घेणे जड जाते तर कधी सासरी गेलेल्या वधूला सासरच्या माणसांबद्धल अडचणी असतात. एक ना अनेक. पण या ठिकाणी एक जुनी ऐतिहासिक गोष्ट बोध घेण्यासारखी आहे ती लिहावीशी वाटते. साधारण ७ व्या शतकातील गोष्ट. ज्या वेळी अरब लोकांच्या आक्रमाणामुळे आणि जाचामुळे पारशी मंडळी पर्शिया सोडून दूर अशा संजाण, गुजरातच्या हिंदूराजा राणा जडी यांच्याकडे आली आणि त्याला म्हणाली की आम्हाला तुझ्या राज्यात आश्रय दे, त्यावेळी त्याने एक दुधाने भरलेली वाटी त्या पारशी मंडळीसमोर ठेवली आणि म्हणाला, जशी ही वाटी भरलेली आहे तसेच माझे राज्य सुद्धा भरलेले आहे त्यामुळे तुम्हाला स्वीकारण्यासाठी माझ्या राज्यात जागा नाही. त्यावर त्या पारशी मंडळीच्या प्रमुखांने एक चिमूटभर साखर मागितली आणि ती त्या दुधाने भरलेल्या वाटीत मिसळली आणि म्हणाला की जसे तुमच्या ह्या दुधाची गोडी साखरेने वाढवली तशी तुमच्या राज्याची शान बनून आम्ही राहू. आमच्यापासून कोणलाही त्रास होणार नाही. आज पारशी समाज हा भारतातील एक अतिशय पुढरलेला, श्रीमंत समाज आहे. भारताच्या लोकसंख्येच्या फक्त ०.००००५ % एव्हडा असून भारताच्या जिडीपी मध्ये त्यांच्या उद्योगधंद्याचा मोलाचा वाटा आहे. त्यांच्या धर्मादाय संस्था खूप मोठे काम करतात. यातून बरेच काही शिकण्यासारखे आहे. जेथे जाल तेथले व्हा. तेथे मिसळून जा. म्हणतात ना पाण्यासारखे पारदर्शी व्हा.! पानी रे पानी तेरा रंग कैसा, जिसमे मिला दे हो जाये वैसा! ( अर्थात ही गोष्ट दुर्जंनांच्या संगतीत लागू होत नाही ) माधव भोळे