रिल्स आणि फॉलोअर्स

 रिल्स आणि फॉलोअर्स 

सध्या रिल्सचा जमाना आहे. चांगल्या सुसंस्कृत, सुशिक्षित घरातील स्त्रिया आणि मुली यांची अघोषित स्पर्धा सुरू आहे. रोज वेगवेगळी वस्त्रे, दागिने, केश रचना, मेकप इत्यादीचा वापर करून वेगवेगळ्या कोनातून फोटो, रिल्स काढून आपापले फॉलोअर्स वाढवण्याचा आणि त्यायोगे काही उत्पन्न मिळते का हे बघण्याचा आणि प्रसिद्ध होण्याचा प्रयत्न सुरू आहे. दररोज आज मीं कशी दिसते या सारखे निरर्थक प्रश्न विचारत आहेत त्याबद्दल हा लेख आहे.

पण ज्या स्त्रिया आणि मुली अशा प्रकारे आपल्या सौंदर्याचे प्रदर्शन करू इच्छितात त्यांना हे समजायला हवे कीं हे सौंदर्य चार भिंतीच्या बाहेर गेले कीं जसे गुळाला मुंगळे चिकटतात तसें मुंगळे आणि मधमाशा आपल्या जवळ घोंगावत राहणार. 

अनेक नेटकरी मग अशा काही घाणेरड्या कमेंट्स करतात कीं त्या स्त्रिया आणि त्यांचे घरांदाज पती, बंधू, माता पिता, सासू सासरे, दीर आणि नणंदा वाचू शकणार नाहीत. तुम्ही म्हणाल आता समानता आणि स्त्री स्वातंत्र्याचा जमाना आहे. नक्कीच पण त्या वातावरणाचा उपयोग आपल्या शिक्षणासाठी, आपले चांगले छंद जोपसण्यासाठी, स्वतःच्या आणि घराच्या उन्नती आणि आर्थिक प्रगती साठी करायला हवा. वेळ पडली तर किंवा अंगात धमक असेल तर कोणताही व्यवसाय किंवा नोकरीं करून घरादाराच्या किंवा समाज कार्य करून देशसेवेसाठी करायला हवा. 

रील एक किंवा फोटो हे समाज माध्यमासाठी एक कंटेन्ट आहे, जों त्यांना जाहिरातीतून पैसे मिळवून देतो. आता आपण आपल्याला किती एक्स्पोज करायचे ते आपणच ठरवायला हवे. हा जर तुम्ही काही कलाविष्कार, ज्ञान, आपल्या व्यवसाय किंवा उत्पादनाची जाहिरात किंवा अन्य काही माहिती या रिल्स द्वारे समाजाला देणार असाल किंवा ते समाजोपयोगी असेल तर जरूर टाकायला हवे. पण आपले सौंदर्य असे वेशीवर टांगून ठेवू नका असे मला वाटते. बाकी निर्णय ज्याचा त्याचा.

माधव भोळे