कोकण रेल्वेची पनवेल चिपळूण लोकल

कोकण रेल्वेची पनवेल चिपळूण लोकल

नुकत्याच जाहीर झालेल्या "एप्रिल पासून कोकण रेल्वेची पनवेल ते चिपळूण ही मेमू गाडी सुरू होत आहे" याबातमीचा काही फेसबुक ग्रुपवर आलेल्या प्रतिक्रिया वाचता, आनंद बाळगण्या ऐवजी तिला टिकेला सामोरे जावे लागत आहे हे दुर्दैवी आहे.

एकाने लिहिले की "कोकण विकायला निघालेल्या ह्या गाडीने आणखी १०० फेऱ्या वाढविल्या तर कोकणात कोकणवासिय रहाणार नाहीत."

एक लिहितो "किती दिवस मूर्ख बनवणार? कधी बंद पडणार ते सांगा". 

दुसरा लिहितो "कशाला पाहिजे लोकल? परप्रांतीयांना जागा विकण्यासाठी का?

काय हा दरिद्री विचार? की आपले भाऊबंद जमिनीवरील हक्क मागायला येतील म्हणून त्यांना ही लोकल नको आहे? पश्चिम रेल्वेवर विरार ते सुरत गेल्ये कित्येक वर्ष सुरू आहे, त्यामुळे गुजरात विकले गेले नाही. मुंबईमधून गुजरात मध्ये जाणाऱ्या कित्येक गाड्या आहेत, पण त्यामुळे गुजरात गरीब झाला नाही उलट गुजरात मध्ये औद्योगीकरण झपाट्याने वाढले आणि स्थानिक रोजगार वाढला. 

गेले काही वर्ष कोकण रेल्वे सुरू झाल्यापासून ३६५ दिवस कोकणात जाणाऱ्या सर्व गाड्यांचे रिझर्वेशन मिळणे दुरापास्त झाले आहे. त्यात शुक्रवारी रात्र ते रविवार दुपारपर्यंत सर्व गाड्या एव्हड्या फुल असतात की रिझर्वेशन डब्बा आणि जनरल डब्बा दोन्ही सारखेच भासतात. अनेक कुटुंब आपली लहान कच्ची बच्ची घेऊन रेल्वे डब्याच्या संडास जवळ कसाबसा पेंगुळत प्रवास करतात. अशा वेळी ट्राफिक वाढल्यामुळे जर रेल्वेने लोकल चालवली तर तुमचे काय जाते? या 

उलट तुम्ही तयार केलेले कोकणी पदार्थ, कोकणची फळ फळावळ खराब न होता विकले गेले तर ते तुमच्या कोकणी भावांच्या उत्पन्नात वाढ करतील. अनेक तरुण ज्यांना कोकण आवडते, त्यांना तेथेच राहून काही व्यवसाय / धंदा करायचा आहे ते त्या लोकलचा उपयोग करतील आणि आपला माल शहरात लवकरात लवकर पोचवतील. 

ज्या प्रदेशामध्ये परप्रांतीय शिरकाव करण्याचा प्रयत्न करतात तेथे काहीतरी संधी किंवा फायदा त्यांना आज ना उद्या दिसत आहे तों फायदा आम्हाला का दिसत नाही? कारण आपल्याकडे दूरदृष्टी नाही, आपल्याकडे सय्यम नाही. आज कोकणात काही उत्पन्न होत नाही अशी रड लावणारे लोक उघड्या डोळ्यांनी बघतात की उत्तर प्रदेश मधील भय्या येऊन बेकरी टाकतो. गुजराथी, कच्छी, मारवाडी येऊन बिल्डिंग मटेरियल, कपडे विकतो. मग जर ती मंडळी आपल्याकडे येऊन पैसा कमावून त्यांच्या समाजाचे मोठ मोठे हॉल बांधतात मग आम्ही कशाला येथे मुंबईमध्ये १ आर के वरून १ बीएचके मध्ये जाण्यासाठी संपूर्ण आयुष्य खर्च करतो? आम्हाला कोणी बंदी केली आहे एखादे छोटेसे दुकान नीट चालवायला? 

पण आम्हाला डायरेक्ट टाटा बिर्ला व्हायचे असते. आमची मुले MBA, IT मध्ये काम करावी अशी अपेक्षा असते मग आमच्या जमिनी दुसऱ्यांनी कसल्या आणि आमच्या बागा नेपाळ्यांनी संभाळल्या तर बिघडते कुठे? म्हणजे जे उत्पादन आमच्याकडे होत आहे त्यावर सुद्धा पाणी सोडायचे का? 

आमच्याकडे कोकणात पर्यटनाला खूप वाव आहे. जरी लोकल आली तरी येथील सृष्टी सौंदर्य कोणी पळवून नेऊ शकत नाही. तेथील लोक आता होम स्टे चालवायला लागले. समुद्र किनारी एका रात्रीचे रूम भाडे रु. २००० ते ५००० मिळायला लागले आणि आडगावात ते ८०० ते २००० मिळायला लागले तर त्यांनी स्थानिक लोकांना रोजगार मिळतोच आहे की. मग तों पर्यटन प्रकल्प ऐपत असेल तर तुम्ही चालवा. कोण नको म्हणतोय? कोकण रेल्वेच्या ह्या लोकलने पर्यटनाला खूप चालना मिळेल. 

म्हणजे आपण काही करायचे नाही, दुसऱ्याला पण काही करू द्यायचे नाही, ही वृत्ती कुठली? 

म्हणजे चांगल्याचा आस्वाद घ्यायचा सोडून मुतात माशा मारत बसायचे.

असो जर एप्रिल पासून पनवेल चिपळूण लोकल सुरू होणार असेल तर कोकण रेल्वेचे मनःपूर्वक अभिनंदन.

माधव भोळे