भारतीय सन्मान आणि यूरोप

भारतीय सन्मान आणि यूरोप 

नुकतेच स्वीतझरडलंड मधील एका हॉटेलने भारतीय पर्यटकांसाठी एक जाहीर नियमावली जारी केली. त्या मध्ये बुफे मधील जेवण खोलीत चोरून नेऊ नका, सार्वजनिक ठिकाणी गोंधळ गडबड करू नका आणि शिस्त पाळा इत्यादी इत्यादी. यावर हर्ष गोयेंका ह्या स्पष्टवक्त्या प्रसिद्ध व्यवसायिकाने भारतीयांना त्या त्या देशाचे सिव्हिक सेन्स पाळण्याचे आव्हान केले. 

ठीक आहे, काही पर्यटक किंवा त्यांचे टूरऑपरेटर चुकलेहीं असतील, पण त्यामुळे सर्व भारतीय पर्यटकांना दोषी धरणे किंवा संशयाने बघणे चुकीचे होईल. 

या आधी सुद्धा जर्मनी मध्ये "Dogs and Indians  are  not allowed" असे बोर्ड रेस्टॉरंट बाहेर लागलेले असत, पण परिस्थिती बदलली आणि भारतीय तंत्रज्ञाना जर्मनी सन्मानाने बोलवायला लागली.

संपुर्ण युरोप आणि अमेरिका हा लुटारुंचा प्रदेश असून त्यांनी भारतीयांना सभ्यता शिकवणे म्हणजे "सौं चुहे खाके बिल्ली चली काशी" म्हणण्यासारखे होईल. युरोपातील बहुतेक देशांनी शस्त्रास्त्र आणि बळाच्या जोरावर आशिया आणि आफ्रिका खंडाला गुलाम बनवले. त्यांच्या सोने, चांदी आणि तांब्याच्या खाणीनवर त्यांनाच गुलाम म्हणून वापरले आणि त्यांना अमानुश छळ करून वागवले. 

अमेरिकेतील आणि ऑस्ट्रेलिया मधील आदिवासी लोकांच्या भयानक कक्तली केल्या, त्यांची घरे दारे लुटून त्यांच्यावर अनन्वित अत्याचार केले. त्यांच्या संस्कृती अक्षरशः पुरुन टाकल्या. वेगळ्या सौरक्षित वसाहतीच्या नावाखाली त्यांना ओपन जेल मध्ये टाकले. त्यांच्या जमिनी हिसकावून घेतल्या. हिटलरने तर मानवतेला काळिमा फसला. 

ब्रिटिश भारतात जन्टलमन व्यापारी म्हणून आले आणि आमच्या राजा राजांमध्ये भांडणे लावून ते भारताचे मालक झाले. भारतीयांचा लाखो कोटींचा कच्चा माल कमी किमतीत परदेशी नेऊन तो परत भारतातच जास्त किमतीला विकला आणि भारताचा पैसा पद्धतशीर पणे भारताबाहेर नेला. नामदार गोपाळ कृष्ण गोखले यांनीतर ब्रिटिश पार्लमेंटमध्ये पुराव्यानिशी सिद्ध करून दाखवले कीं ब्रिटिश आणि त्यांच्या अधिकाऱ्यांचे पगार आणि लाड पुरवण्यासाठी भारताला गरिबीत ठेवले गेले. आज युरोपच्या कोणत्याही म्युझियम मध्ये गेलात तर तेथे भारतातून स्मगल केलेल्या भारतीय मूर्ती, चित्रकला दिसतील. भारताचा कोहिनुर आणि छत्रपती शिवाजी महाराज्यांची तलवार अजूनही लंडनच्या संग्रहलयात आहे. 

संबंध जगाला लुटणारे हीं मंडळी आज भारतासारख्या महान देशाला सभ्यता शिकवत आहेत हे जगातील आठवे आश्चर्य आहे. 

माधव भोळे